Daxwaza navçebûyîna Rûbarokê hate redkirin
Walîtiya Colemêrgê û leşkeriyê, xwest ku Bajaroka Rûbarokê ku girêdayî Navçeya Şemzînana Colemêrgê ye, li ser sînorê Herêma Kurdistana Federal e û piraniya wê ji cerdevanan pêk tê, bibe navçe.
Serlêdana walîtî û leşkeriyê, di civîna meha gulanê ya Meclîsa Giştiya Bajêr de hate nirxandin. Endamên meclîsê 2 komîsyon ava kirin, piştî ku lêkolînên têkildarî mijarê kirin, civiyan. Endaman, diyar kirin ku Rûbarok ji bo navçebûyînê ne guncaw e û daxwaza walîtî û leşkeriyê hate redkirin. Waliyê Colemêrgê Ayhan Nasuhbeyoglu, biryar qebûl nekir, serî li Dadgeha Îdare ya Colemêrgê da û doz vekir.
Serokê Meclîsa Giştiya Bajêr Ferheng Yazgan, diyar kir ku Bajaroka Rûbarokê nekarî bibe navçe û wiha dom kir: “3 sedemên vêya hene. Ger ku bibe navçe, wê Şemzînan di hêla aborî de têk biçe. Li gorî zagonan, divê tax û navçe 5 kîlometre dûrî hevdu bin. Lê navbera di nav Rûbarokê û gundên din ên anha girêdayî wê ne de, 13-15 kîlometre ye. Nifûsa Bajêrgê û Xirvatê zêdetir e. Ger ku hewce ye, divê ev bajarok bibin navçe.” Yazgan, anî ziman ku rayedar û AKP, dixwazin li ser Rûbarokê rant bidest bixin û wiha dom kir: “Me bi nûnerên saziyên civakî yên sivîl re û bi rayedaran re hevdîtin çêkir û ev biryar girt. Me di hevdîtin û lêkolînan de dît ku derfetên ji bo Bajaroka Rûbarokê bibe navçe, tunene.” Yazgan, îdîa kir ku sedema daxwaza ji bo Rûbarok bibe navçe, ranta siyasî ye.
SAMÎ YILMAZ/ DÎHA/COLEMÊRG
|